Mun Utanríkisráðherra hlusta?

Nú eru eflaust margir undrandi, einhverjir reiðir, aðrir bölva í hljóði eða eru hreinlegir mjög hneysklaðir. En stærsta spurningin er kannski af hverju fólk er svona undrandi, reitt, bölvandi og mjög hneykslað? Svarið er líklega mjög einfalt, Sölmundur Karl er byrjaður aftur að blogga. Já, þið lásuð rétt, ég er byrjaður að blogga aftur. Í þetta skiptið ætla ég þó að reyna að vera duglegri að blogga þar sem maður hefur jú, nægan frítíma.

Núna eru nærri 20 dagar síðan að ég varð 24. ára, sem er ekki frá sögu færandi nema að mér líður ennþá bara eins og ég væri 23. ára. En á meðan að ég hef hár á höfði og Samfylkingin er enn í meirihluta á þingi og í Akureyrarbæ er mér sama hvort ég sé 23. eða 24. ára. Skólinn í ár kláraðist óvenju snemma, en ég var kominn í sumarfrí þann  6. maí. Kennarar voru virkilega snöggir að skila inn einkunnum, og skiluðu allar 18 einingarnar í hús, og er ekki frá því að skólaárið 2007-2008 hafi verið eitt af því besta á mínum námsferli. Þannig að það eru aðeins 27 einingar eftir af Háskólanum og allt bendir til að maður klári á réttum tíma, nema náttúrlega ef maður slái næsta skólaári upp í kæruleysi til að vera eitt ár lengur. Er hins vegar farinn að huga efni í hugsanlegri lokaritgerð, og til að finna aukinn innblást fyrir hugsanlegt lokaverkefni er maður að lesa bókina Háskaleg hagkerfi eftir Þráinn Eggertsson.

Morgunblaðið finnst greinilega gaman að stríða manni. Því Morgunblaðinu fannst jú gaman að geta birt grein eftir mig á aðfangadag þar sem ég var að skamma seðlabankastjóra. En Sunnudagsblaði Morgunblaðsins birtist grein eftir mig sem ég var löngu búinn að gleyma að ég hafi skilað inn. En greinina skrifaði ég þegar Utanríkisráðherra birti nýtt frumvarp um alþjóða þróunarsamvinnu Íslendinga. Frumvarpið var ekki eins og ég hefði viljað. En Morgunblaðið vildi greinilega bíða með að birta þessa grein þangað til að þinghlé væri gert þannig að grein mín hefði lítið að segja. Ég vona hins vegar að Formaður Samfylkingarinnar sem og aðrir þingmenn. Í raun hef ég nokkrar hugmyndir um hvernig Ísland eigi að bæta þróunarsamvinnu sína, en hvort að Ingibjörg Sólrún Gísladóttir hlusti á mig, skal ósagt látið en ég að sjálfssögðu vona það. Þeir sem ekki hafa aðgang að Morgunblaðinu geta lesið greinina á politik.is.  Ég mun þó halda áfram að skrifa og skoða þróunarsamvinnu Íslendinga, hvort sem Sighvati Björgvinssyni framkvæmdarstjóra Þróunarsamvinnustofnun Íslands líkar betur eða verr.

En hvað með það. Þó svo að mér finnist handbolti ekkert sérstaklega skemmtileg íþrótt ætla ég nú samt að horfa á leik Íslands og Svíþjóðar. En hvort sem manni finnst íþróttin skemmtileg eða ekki, styður maður jú auðvitað sitt landslið.

Í Arkansas..........

,,Sumarið er tíminn þegar hjartað verður grænt” söng meistari Bubbi Morthens, en þrátt fyrir sumarið er hjartað mitt bara ennþá rautt, rétt eins og hjá sönnum jafnaðarmanni. Ég hef verið mjög latur við að blogga í sumar, enda hef ég bara í sannleika sagt ekki nennt að blogga, enda er sumarið hjá mér bara býsna rólegt, lítið um að vera nema kannski vinnann. Fyrir þá sem ekki vita er ég að vinna hjá póstinum, byrjaði fyrr í sumar að vinna frá klukkan 07:00-12 og síðan aftur 15:30-19:00.En svo í Júlí var vaktinni minni breytt og nú vinn ég frá klukkan 14:00-22:00. Þessi nýji vinnutími gerir það að verkum að ég er að keyra út á kvöldin sem þýðir fyrir ykkur sem búa á Akureyri og eigið von á pakka er aldrei að vita nema að ég banki upp á.

Þrátt fyrir að ég sé ekki að blogga reglulega þá er ég að skrifa mjög mikið í sumar. Er búinn að skrifa svona einn og einn bút í greinar sem eiga eftir að birtast opinberlega, svo núna geti þið beðið spennt. Einnig hef ég verið að leika blaðamann í sumar, en þó mismikið. Hef verið í sumar að skrifa um leiki Þórs í knattspyrnunni fyrir síðunna fotbolti.net, og hef haft gaman af þó svo að úrslitin hafi ekki verið eins og best verður á kosið. En maður er jú professional í þessu starfi svo að ég læt það ekki á mig fá í skrifum. Síðan prófaði ég að vera blaðamaður fréttablaðsins í eitt kvöld er þegar svokallaður Old boys landsleikur var hér á Akureyri. Það að vera blaðamaður í einn dag var ótrúlega gaman, og það var gaman að tala við menn eins og Guðna Bergs, Eyjólf Sverrisson, Atla Eðvalds og Halldór Áskelsson, allt saman menn sem maður horfði á leika knattspyrnu þegar maður var yngri.

Annars hefur sumarið hingað til verið mjög rólegt, og þegar maður er ekki að vinna né að skrifa þá er maður bara að lesa. Er þessa dagana að lesa tvær bækur, sú fyrri er mjög athyglisverð, en sú bók heitir Fall Berlínar, mjög fróðleg bók. Einnig er ég að lesa bók eftir Kurt Vonnegut, Breakfast of the Champions. Hef alltaf ætlað að lesa hana eftir að ég las Slaugtherhouse Five. Hef ekki ennþá orðið fyrir vonbrigðum með bókina, er þó ekki búinn með hana, en hún er mjög kaldhæðin, og með skrítin humor, sem er bara gott mál. 

 Já, síðan má ég ekki gleyma þeim stórmerkaatburði að ég fór út á skemmtanalífið sl. laugardag. Já, þið lásuð rétt. Ég þorði loksins að snúa aftur í miðbæ Akureyrar og nú í fylgd nokkurra höfuðborgarbúa. Fór fyrst á Græna hattinn á tónleika með raddbandinu Voxfox, algjör snilld, hef sjaldan skemmt mér svona vel á tónleikum og þarna, tær snilld og mæli með því að fólk fari á tónleika með þessum krökkum. Eftir tónleikanna tók ég þau Pálma frænda, Birgittu kærustu hans og Siffu frænku á Café Amour og bauð þeim  Hvítvín, Breezer og bjór. Ekki amalegt að fara út að skemmta sér með mér, eða hvað? En höfuðborgarbúarnir gáfust fljótt upp, og héldu heim á leið, ég var kannski ekki eins skemmtilegur og ég hélt? Ég hins vegar hélt bara áfram, var smá stund lengur á Amour, en síðan ætlaði ég að hitta á Helga sem var staddur í bænum. En á leiðinni til Helga hitti ég á Reyni sem var fyrir utan Kaffi Karólínu, fór aðeins með honum inn á kaffi Karólínu, hitti þar meðal annars líka hann Hjalta Þór félaga minn úr Háskólanum. Síðan þegar ég gafst upp á kaffi Karólínu, náði ég loks á Helga í miðbænum þegar hann og Áslaug voru að versla sér eitthvað að borða. Síðan þegar heim var komið fór ég upp í rúm, fékk mér afgang af marsipantertu sem til var í ísskápnum og horfði á gamla spaugsstofuþætti sem og einnig gömul tilþrif með Michael Jordan, hvað er betra?

 

Lofa að það verður styttra í næsta blogg.

 

Nytsamlegur fróðleikur: Í Arkansas eru munnmök bönnuð og ekki má geyma krókódíla í baðkörum. Þar að auki er ólöglegt að bera nafn ríkisins vitlaust fram.

Kv,

Sölmundur Karl Pálsson

Vel heppnuð grillveisla

Í gær tók ég upp á þeirri nýbreytni og bauð nokkrum útvöldum í grillveislu í gær, grillaðar voru pylsur, hunangslegið svínakjöt og kryddaðar svínakotelettur og í eftirrétt voru siðan grillaðir banannar sem fylltir voru með mars súkkulaði og einnig var boðið upp á vanillu ís. Ég bauð foreldrum mínum og yngri systur minni, enda var það faðir minn sem grillaði, enda algjör snillingur á því sviði. Síðan bauð ég honum Einari, en fyrir þá sem ekki vita þá kynntist ég honum í viðskiptafræðinni í Verkmenntaskólanum, í þeirri miklu klíku sem viðskiptadeildinn var í þá daga. Einnig bauð ég henni Valdísi formanni UJA, en henni kynntist ég nú líka í viðskiptafræðinni í VMA, og síðast en ekki síst bauð ég þeim heiðurshjónum Margréti Kristínu og Reyni Alberti ásamt barni þeirra Sunnu Mekkín. En Margréti kynntist ég í gegnum UJA en Reyni kynntist ég í gegnum Háskólann. 

En til að gera langa sögu stutta, þá var maturinn tær snilld sem og eftirrétturinn sem auðvitað bregst aldrei. Ég held að grillveislan hafi heppnast ágætlega, þó svo að veðrið hefði ekki verið upp á sitt besta, og því var ekki hægt að borða úti, en það verður bara að bíða betri tíma. Og ekki má gleyma því að Sunna Mekkín dóttir þeirra Möggu og Reynis fór algjörlega á kostum í veislunni. Hins vegar var tilefni grillveislunar tvíþætt, það fyrsta var þetta nokkurskonar afmælismatur, þar sem ég átti afmæli þann 12. maí en þurfti að vinna í undirkjörstjórn og gat því ekki haldið neina veislu eða neitt á afmælisdaginn minn. Seinna tilefnið var bara að þakka fyrir mig. Ég tók erfiða ákvörðum þegar ég ákvað að hætta í hagfræðinni í HÍ og koma heim aftur, mér leið þó vel í Reykjavík en þó vantaði ávallt eitthvað svo að ég gæti fest mig í sessi í Reykjavík. En þetta fólk sem ég bauð í grillveisluna, hefur gert þessa ákvörðun mína að snúa aftur heim, að líklega að minni bestu ákvörðun og ég sé ekki eftir því að fara í Háskólann á Akureyri. Og í raun hefur þetta fólk gert þetta skólaárið eitt af því besta sem ég hef upplifað. Það var gaman að geta aftur horft á Meistaradeildar leiki með Einari, rétt eins og maður gerði þegar maður var í VMA. Síðan er ég mjög ánægður með að Valdís hafi hringt í mig í haust og drifið mig inn í starfið hjá UJA, en það starf hefur verið mjög gefandi og skemmtilegt, enda kynnst fullt af frábæru fólki. Síðan auðvitað hef ég lært heilmikið af hjónunum Margréti og Reyni, þau hafa sýnt manni að það er hægt að stofna heimili og verið samt í fullu háskólanámi, og staðið sig vel. Reyndar hef ég lært heilmikið af henni Margréti á þessum fáu mánuðum sem ég hef þekkt hana, og síðan hefur Reynir maðurinn hennar sem og aðrir skólafélagar í HA gert skólann skemmtilegan, og nú er aftur orðið gaman að mæta í skólann. Einnig er ég mjög ánægður með að foreldrar mínir skildu hleypa mér aftur inn í húsið þeirra, eftir að hafa flutt að heiman.Allt þetta fólk hefur gert mig þó að betri manneskju, sem hlýtur að vera markmið manns að verða ávallt betri manneskja. En síðan auðvitað vantaði nokkra aðra vini mína, t.d. Helga og Halldór, en þeir báðir búa í Reykjavík, og gátu því ekki komist.

Hins vegar segi ég bara enn og aftur takk fyrir mig, þið eruð frábær! Ég mun eflaust endurtaka þennan leik í sumar þegar veðrið verður betra og maður getur borðað úti.

 Kv,

Sölmundur Karl Pálsson

Spennandi súpufundur Þórs á morgun

Þar sem maður er á fullu í prófum, hefur maður haft lítinn tíma til að skrifa og annað, en aðeins tvo próf eftir þannig að þetta er alveg að hafast hjá manni. Hins vegar ætla ég að minna fólk sem statt er á Akureyri eða Eyjafjarðarsvæðinu á spennandi súpufund Þórs á morgun. Umræðuefni fundarins verður skýrsla hennar Þórdísar Lilju Gísladóttur ,, hagrænt gildi íþrótta í nútíma samfélagi", en gestir fundarins verða fulltrúar allra framboðana í Norðaustur kjördæmi. En fyrir hönd míns flokks, Samfylkingarinnar verður hún Lára Stefánsdóttir, en hún fyrir þá sem ekki vita skipar 3. sæti á lista flokksins í kjördæminu. Aðrir gestir fundarins verða þau Kristján Þór Júlíusson sem skipar fyrsta sæti á lista sjálfstæðisflokks, Höskuldur Þórhallsson sem skipar 3. sætið hjá framsókn, Sigurjón Þ. Þórðarson 1. maður á lista frjálslyndaflokksins, Hörður Ingólfsson sem er oddviti Íslandshreyfingarinnar í kjördæminu og svo loks Dýrleif skjóldal sem skipar að ég held 3. sæti á lista VG. En nánar um súpufundinn má lesa á heimasíðu Þórs. En ég hvet alla til að mæta á þennan fund, en er skýrsla hennar Þórdísar mjög áhugaverð, og sýnir einnig vel þá óréttlætingu í tekjuskiptingu Ríkis og sveitarfélaga. Einnig á Þór hrós skilið fyrir þessa súpufundi, sem er skemmtileg viðbót við þjóðfélagsumræðunna. En enn og aftur hvet ég alla stjórnmálamenn á svæðinu að mæta, sem og þá sem hafa áhuga á íþróttum. ALLIR AÐ MÆTA. Súpufundurinn er klukkan 12:00 á morgun (fimmtudag) og er haldinn í félagsheimili Þórs.

kv,

Sölmundur Karl Pálsson

 

Landsfundur búinn-Alvaran tekin við

Þá er helgin búinn og hversdagsleikinn tekinn við. En um helgina skrapp maður suður til Reykjavíkur á Landsfund Samfylkingar. Lagt var eldsnemma á föstudagsmorgni til að ná málefnavinnu sem átti að hefjast klukkan 13:00 í Egilshöll, og vorum við komnir um hálf eitt í bæinn. Málefnavinnann gekk ágætlega, og var ég í hóp sem fjallaði um ábyrga efnhagsstefnu og síðan nýtt atvinnulíf, en þeim hópi stjórnuðu þeir félagar Ágúst Ólafur Ágústsson og Einar Már Sigurðarsson. Reyndar var ég nokkuð rólegur, og leyfði öðrum um að tjá sig, þar sem ég var fyrir fundinn sammála þeirri stefnu sem Samfylkingin hefur lagt fram í efnahagsmálum. Loks um klukkan 16:00 setti formaðurinn Ingibjörg Sólrún fundinn formlega settan, og var ræðan hennar nokkuð góð, eins og fyrri daginn. Eftir henni stigu síðan Mona Sahlin og Helle Thorning -Schmidt á stokk, og fluttu áhugaverðar ræður, en mér fannst þó Dagur B. Eggertsson sló þó í gegn, þar sem hann virtist hafa náð í sitt kvenlega innsæi þegar hann var að þýða. Síðan fór maður til hennar Helgu í Dunhaga um klukkan 21:20 eða svo, enda þurfti maður að vakna snemma á laugardagsmorgunin.

Laugardagsmorgunin var tekinn snemma, enda var maður mættur um klukkan 09:00 í Egilshöllina, en á laugardeginum var farið yfir skýrslu formanns Framkvæmdarstjórnar, reikninga gjaldkera, síðan var kosið til ritara flokksins, en Helena Karlsdóttir mun starfa áfram sem ritari, einnig var kosið til gjaldkera. Loks var kosið til Framkvæmdarstjórnar, og þar var t.a.m. hann Magnús Már kjörinn inn, og vil ég hér með óska honum til hamingju með það, enda topp maður þar á ferð, en ásamt honum voru þau Margrét Gauja, Anna Guðnadóttir, Eva Kamilla, Helgi Pétursson og Eggert Herbertsson einnig kjörin, og vil ég einnig óska þeim velfarnaðar. Það var einnig kosið til flokksstjórnar. Síðan var samþykkt ályktanir og nokkur skemmtiatriði, eins og t.d. Baggalútur og Sprengihöllin stigu á stokk. Loks voru þau Ingibjörg Sólrún og Ágúst Ólafur endurkjörin Formaður og varaformaður flokksins, sem kom engum á óvart. Loks sleit síðan Ingibjörg landsfundnum um klukkan 18:00.

Um kvöldið var síðan haldið lokahóf á Grand Hótel, og byrjaði sú skemmtun um klukkan 20:00. Komu nokkuð góð skemmtiatriði, t.d. Róbert Marshall og Guðmundur Steingrímsson tróðu upp með virkilega góðum árangri, sem var bara hrein snilld. En mér fannst þó Magga Stína koma hvað mest á óvart bæði á Landsfundinum og síðan á skemmtuninni um kvöldið. Á landsfundinum spurði gamall þingmaður hana spurningar, sem hún svaraði með stakri snilld. En um kvöldið kom hún  skemmtilega á óvart, ég þóttist halda að hún væri sá frambjóðandi sem ég þekkti best til, en svo var ekki. Hún var heldur betur ein af stjörnum kvöldsins, og ég segi það alveg hlutlaust. Magga Stína sýndi um kvöldið að hún kynni að syngja, allavega syngur hún betur en ég, sem er reyndar ekki talið erfitt, og síðan er konan greinilega mikill grínisti, sem ég vissi reyndar fyrir, en þetta atriði hennar kom skemmtilega á óvart, og hver veit nema að hún taki atriðið sitt aftur við tækifæri. Hún mun kannski syngja þetta lag, ef hún kemst inn á þing eftir kosningar 12. maí. 

Ég hins vegar vildi að ég hefði getað skemmt mér eins vel og flestir aðrir, en því miður gat ég ekki notið landsfundarins, og lokahófsins eins vel og ég hefði óskað mér. Undanfarna tvo til þrjá mánuði hef ég átt í miklum vandræðum innvortis, sem erfitt er að útskýra hér, nema að ég á erfitt með að kyngja mat, sem og oft að halda honum niðri. Ég var því mjög slæmur innvortis um helgina, og ef einhverjum finnst ég hafa verið fúll eða eitthvað svoleiðis, þá er það einungis út af verkjum, engu öðru. Ætla í þetta eina skipti að skrifa um mitt líkamlega ástand, til að fyrirbyggja allan misskilning. En næsti Landsfundur er eftir tvö ár, þannig að vonum að ég verði betur upplagður, en núna er að styttast í kosningar, og við verðum öll að leggjast á við eitt, því við þurfum að fella ríkisstjórnina.

Sölmundur Karl Pálsson

Á ferð og flugi

Í dag sótti ég mjög áhugaverðan og skemmtilegan fund á Grand hótel sem bar yfirskriftina ,, jafnvægi og framfarir- ábyrg efnahagsstefna". Ég mætti ferskur rétt yfir átta leytið í morgun, enda átti fundurinn að byrja klukkan 8:30. Þegar ég mætti á svæðið, þá sá ég fólk í einum fundarsalnum, og taldi mig vera á hárréttum stað, en þegar ég kom inn í salinn, var mér fljótt snúið við, og sagt að fjármálaráðuneytið væri með fund í þessum sal, og þeir vildu víst ekki leyfa mér að fræða þá um ábyrgð í ríkisfjármálum og annað. En þegar ég fékk loks að vita hvaða sal þessi morgunfundur ætti að vera, beið ég nú bara rólegur eftir að hún MaggaStína mætti á svæðið, til að leiða mig í gegnum alla þessa þekktu þingmenn og aðra stjórnmálamenn sem mættu á fundinn. Eftir að við fundum sæti, þá biðum við bara eftir að fundurinn myndi byrja. Samfylkingin dreifði ritinu ,, jafnvægi og framfarir-ábyrgð efnahagsstefna", og Jón Sigurðusson frv. ráðherra og seðlabankastjóri kynnti niðurstöður ritsins, enda var Jón ritstjóri ritsins. Niðurstöður ritsins komu nú kannski ekki á óvart, enda hefur því miður ríkisstjórnin ekki staðið sig nógu vel í ríkisfjármálum eins og maður vildi, en ég á örugglega eftir að skrifa nánar um það síðar. Hins vegar á Jón Sigurðsson og hans fólk sem vann við ritið hrós skilið, enda var ritið vel unnið. Síðan þegar erindi Jóns Sigurðssonar lauk, þá tóku pallborðsumræður við, og þar sátu þau Jón Sigurðsson og Ingibjörg Sólrún undir svörum, auk þess sátu Hörður Arnarsson forstjóri Marel og Þóra Helgadóttir hagfræðingur í greiningardeild Kaupþings. Kom margt fróðlegt upp í þeim umræðum, enda er Hörður og Þóra afar fær á sínu sviðum. Fundarstjóri var síðan Ágúst Ólafur Ágústsson varaformaður Samfylkingar, og stóð hann sig mjög vel, enda var ekki búist við neinu öðru. En til að gera langa sögu stutta, þá var þetta mjög góður fundur og ég sé ekki eftir því að ferðast til Reykjavíkur, bara til þess að fara á þennan fund.

En þegar fundi lauk, þá var stefnan sett á vesturbæinn, og vil ég hér með þakka MögguStínu fyrir að gefa sér tíma til að skutla mér í vesturbæinn, enda algjör snillingur þar á ferð. En í hágdeginu, fór ég og Helgi vinur minn á Subway, og síðan eyddi ég mest öllum deginum heima hjá honum, þar sem við horfðum á þátt af Band of Brothers, snilldar þættir by the way. En ég átti síðan flug klukkan 18:30, en því seinkaði til klukkan 18:55, en í raun fór síðan flugvélin ekki fyrr en 19:10 eða svo í loftið, þannig að ég kom heim til Akureyrar um klukkan 20:00. Vil ég hér með þakka Helgu og Tedda fyrir gistinguna, og einnig þakka ég Helga fyrir móttökurnar i dag.

En Reykjavík er þó ekki alveg laus við mig, en ég fer á morgun (fimmtudag) í skólann, en síðan á föstudaginn mun ég snúa aftur til höfuðborgarinnar. En um næstu helgi verður Landsfundur Samfylkingar haldin, og verður þetta fyrsti Landsfundurinn minn, og vonandi ekki sá síðasti, enda er ég orðinn þvílíkt spenntur að fara á Landsfundinn. Ég og faðir minn munum leggja sko snemma af stað á föstudagsmorgun eða nánar tiltekið klukkan 08:00 um morgunin, enda viljum við ekki missa af miklu á Landsfundinum.

 

Sölmundur Karl Pálsson

Hvar er áhuginn?

Í fyrsta skipti í langan tíma langar mér í raun ekkert til að skrifa um þjóðfélagsmál, eða pælingar mínar eða neitt. Síðustu daga hef ég varla haft áhuga á að skrifa pistla eða annað slíkt, get hreinlega ekki komið orðum á blað, og í raun hef ég enga aðra skýringu á letí mínu við að blogga. Síðustu vikur hefur áhugin á skrifum minnkað töluvert, og eins áhuginn á stjórnmálum farin að dvína eitthvað örlítið. En ég nýt þess þó að aðstoða einn ákveðinn frambjóðenda, og það heldur mér líklega gangandi í pólitíkinni, enda ekki oft sem maður fær tækifæri til að aðstoða leiðtoga framtíðarinnar. En vonum þó að áhugin fari að vaxa aftur eftir páska, enda þá verður kosningabarátta flokkana farin á fullt. En ég kveð í bili, og vonandi kemur inn ferskur pistill inn sem fyrst hjá manni.

 kv,

Sölmundur Karl Pálsson

Vel heppnaður Stjórnmálaskóli

Um helgina héldum við ungir jafnaðarmenn á Akureyri stjórnmálaskóla, við vorum búin að fá marga góða fyrirlesara til liðs við okkur. Við fengum t.d. Ágúst Ólaf varaformann Samfylkingar, Katrínu Júlíusdóttir og Kristján Möller alþingismenn, Birgir Guðmundsson lektor, Hermann Jón Tómasson formann bæjarráðs, Láru Stefánsdóttur frambjóðenda og svo loks Hildi Jönu Gísladóttur.

Á föstudagskvöldið klukkan átta byrjaði skólinn formlega, Margrét Kristín Helgadóttir skólastjóri setti skólan formlega, og eftir henni steig Birgir Guðmundsson lektor við félagsvísinda og lagadeild Háskólans á Akureyri í pontu, og fræddi nemendur um íslenskan stjórnskipa, alþingiskosningar og fór rétt í stjórnmálasögu Íslands. Fyrirlestur Birgis var mjög áhugaverður, og skemmtilegur, og þó hann talaði í um tvo tíma, var aldrei dauður punktur. Margt merkilegt kom fram, og þá sérstaklega þegar hann fór að fræða nemendur um alþingiskosningar, og þá sérstaklega söguna sem og skoðanakannanir. Kom t.a.m. fram hjá Birgi að flokkar sem væru aðeins með eitt stefnumál, myndu líklega ekki ná langt í kosningunum 12. maí, og Birgir taldi m.a. að Vinstri Grænir myndu ekki halda þessu flugi sem þeir hafa verið á í skoðanakönnunum. Vil ég hér með þakka Birgi fyrir áhugaverðan fyrirlestur, og alveg hrein snilld að hann hafi gefið sér tíma til að halda fyrirlestur í stjórnmálaskólanum.

Nemendur vöknuðu snemma á laugardagsmorgunin, en klukkan tíu hófst fyrirlestur þeirra Hermanns Jóns Tómassonar oddvita Samfylkingarinnar hér á Akureyri, og Margrétar Kristínar Helgadóttur, sem er ein af efnilegustu stjórnmálamönnum landsins. Hermann fræddi nemendur um vinnu í sveitastjórnmálum, hvernig málefnasamningur er gerður, og fræddi einnig nemendur hver staðan er hér á Akureyri. Margrét Kristín hins vegar fræddi nemendur um sína hlið í sveitarstjórnmálum, hvernig það sé að vera ung í pólitík, og hennar starf sem formaður Samfélags- og mannréttindaráðs. Eiga þau bæði mikið hrós skilið fyrir góðan fyrirlestur, sem var mjög fræðandi fyrir nemendur eins og mig, sem hafa lítið verið inn í sveitastjórnarmálum.

Næst á eftir þeim kom Lára Stefánsdóttir,  hún fræddi nemendur um netið og stjórnmálamenn. Í fyrirlestri sínum kom hún inn á hvernig stjórnmálamenn geta nýtt sér netið til þess að koma sér á framfæri. Hún t.d. fræddi nemendur hvernig Björn Bjarnason hafi notfært sér netið til að koma sér í kynni við ýmist fólk, og með miklum dugnaði í skrifum á netinu, náð að skapa sér ákveðnar vinsældir. Lára gaf nemendum ráð til að nýta sér netið enn betur, þegar blogg skriftum er komið eða greinarskrifum. Þetta var mjög fróðlegur fyrirlestur, og á hún eins og allir aðrir hrós skilið. En þegar Lára var búinn að halda sinn fyrirlestur, var komið að hádegishléi, og beðið síðan eftir að Ágúst Ólafur og Katrín Júlíusdóttir myndu lenda á Akureyrarflugvelli.

Eftir hádegishléið, hélt Ágúst Ólafur Ágústsson varaformaður Samfylkingarinnar fyrirlestur um efnahagsmál, og var sá fyrirlestur mjög vel sóttur, og greinilegt að margir vilja fræðast um efnahagsmál fyrir komandi kosningar. Ágúst Ólafur fræddi nemendur fyrst um grunnhugtök hagfræðinnar, og síðan fræddi hann nemendur um stöðuna á Íslandi, og kom meðal annars fram að Íslendingar þurfa að fá stöðugleika í hagkerfið, því markmiði hefur ríkisstjórnin ekki náð. Sem gamall hagfræðinema, fannst mér þessi fyrirlestur mjög góður, og margt fræðandi í honum, og ég vona svo sannarlega að nemendur skólans hafi verið upplýstari um efnahagsmál eftir þennan fyrirlestur.

Eftir Ágústi kom Kristján Möller alþingismaður, og fræddi nemendur um alþingisstörf, og hvernig það er að vinna á þessum merka vinnustað. Fyrirlestur Kristjáns var mjög fræðandi, og gaman að fá smá innsýn í störf þingmanna. Eftir fyrirlestur Kristjáns, spruttu athyglisverðar umræður um vinnutíma alþingsmanna. Mönnum fannst vinnutími alþingismanna ekki fjölskylduvænn, og væri í raun skrítið að löggjafarþingið bryti sjálft vinnulöggjöfina. En þrátt fyrir þennan langa vinnutíma, og þá staðreynd að Alþingi er ekki fjölskylduvænan vinnustaður, þá væri hann þó eftirsóttur vinnustaður.

Loks kom Katrín Júlíusdóttir og Hilda Jana Gísladóttir með sína fyrirlestra. Katrín fræddi nemendur hvernig eigi að bera sig fram í ræðupúlti, og lét síðan nemendur koma fram og halda einnar mínútu ræðu. Kom þá í ljós að allir nemendur skólans voru frambærilegir ræðumenn. Loks fræddi Katrín nemendur, hvernig eigi að koma skoðun sinni á framfæri, og sýndi nemendum ýmiss dæmi úr blöðunum hvernig ætti ekki að skrifa greinar. Eftir Katrínu kom síðan Hilda Jana með fyrirlestur um fjölmiðla, og hvernig ætti að bera sig að í fjölmiðlum, og stóð hún sig með prýði, rétt eins og Katrín. En að lokum settu þær Katrín og Hilda Jana upp smá spjallþátt, og leyfði nemendum að æfa sig að rökræða og gekk það býsna vel.

Um klukkan sex, sleit síðan Margrét Kristín Helgadóttir skólastjóri skólanum. Margrét Kristín á mikið hrós skilið fyrir skólann, og þá sérstaklega skipulagningu og hvernig hún stjórnaði skólanum af mikilli nákvæmni. Og það er því ekkert skrítið að ég sem og fleiri teljum hana framtíðar bæjarstjóra eða jafnvel framtíðar ráðherra.

Sölmundur Karl Pálsson

Stjórnmálaskóli Samfylkingarinnar á Akureyri

Ungir Jafnaðarmenn á Akureyri munu halda stjórnmálaskóla Samfylkingarinnar í Lárusarhúsi Eiðsvallargötu 18 um helgina, þ.e.a.s. dagana 23. - 24. mars. Skólinn er opinn öllum að kostnaðarlausu, og vil ég því hvetja alla til þess að mæta, enda skemmtilegir fyrirlestrar á dagskrá skólans. Ég hef verið það heppinn að fá tækifæri til að aðstoða Margréti Kristínu í að skipuleggja skólann, og hreint ótrúlegt hversu við höfum verið lánsöm með fyrirlesara. Það er því líka mikill heiður að fá að segja að Margrét Kristín verður einnig skólastjóri skólans, og býst ég við að hún verði hreint út sagt stórgóður skólastjóri. En ég hvet annars alla til að koma í stjórnmálaskólann, en það er ekki skylda að sitja allan skólann, en auðivitað væri það skemmtilegast. En fólk ræður því hvaða fyrirlestra þau vilja fara á, en að sjálfssögðu er mjög erfitt að velja bara einn fyrirlestur, margir góðir í boði. En dagskráin er eftirfarandi:

Stjórnmálaskóli Samfylkingarinnar 23. - 24. mars

Föstudagurinn 23. mars

20:00 Margrét Kristín Helgadóttir skólastjóri - setning stjórnmálaskólans

20:05 Birgir Guðmundsson lektor við félagsvísinda og lagadeild HA - Íslensk stjórnskipan, alþingiskosningar og (ESB)

Laugardagurinn 24. mars

10:00 Hermann Jón Tómasson formaður bæjarráðs og Margrét Kristín Helgadóttir formaður Samfélags- og mannréttindaráðs - sveitastjórnmál, meirihlutasamstarf og ungt fólk í pólitík

11:00 Lára Stefánsdóttir varaþingmaður - Stjórnmálamenn og netið

Hádegishlé

13:05 Ágúst Ólafur Ágústsson Varaformaður Samfylkingarinnar - Efnahagsmál

14:00 Kristján Möller og Einar Már Sigurðarson Alþingismenn - þingstörf og nefndarstörf

15:00 Katrín Júlíusdóttir Alþingismaður - framkoma í ræðupúlti - koma hugmyndum sínu vel á framfæri

16:00 Katrín Júlíusdóttir og Hilda Jana Gísladóttir - framkoma í fjölmiðlum

17:00 Margrét Kristín Helgadóttir skólastjóri - Slit stjórnmálaskólans

Ég hvet því alla Akureyringa og nærsveitarmenn að mæta í skólann, og fræðast aðeins um stjórnmál, og kynnast um leið frambjóðendum og alþingismönnum.

Sölmundur Karl Pálsson

Fundur um Fagra Ísland

Í gær héldum við Ungir jafnaðarmenn á Akureyri fund í nýja bíó um umhverfismál og stefnu Samfylkingarinnar í þeim málum, og í lok fundarins buðum við fundargestum upp á bíó, en fundargestir fengu að horfa á an inconvenient truth eftir Al Gore. Fundurinn heppnaðist nokkuð vel, en þó hefði verið skemmtilegra að fá fleiri á fundinn, en veðrið var allavega ekki að hjálpa okkur mikið.

Fundurinn byrjaði á framsögu Guðmundar Steingrímssonar, en hann fjallaði um umhverfisstefnu Samfylkingarinnar, þ.e.a.s. bæklingin okkar Fagra Ísland, en svo virðist sem fleiri ætli sér að taka sér þann fína bækling til fyrirmyndar. En Guðmundur gerði umhverfisáætlun Samfylkingarinnar góð skil, enda góð stefnuskrá þar á ferð. Vil ég hér með þakka honum fyrir að gefa sér tíma til að skreppa norður og halda þennan fyrirlestur.

Á eftir Guðmundi kom Lára Stefánsdóttir, sem skipar þriðja sætið á lista Samfylkingarinnar í Norðaustur kjördæmi, en hún fjallaði um umhverfismál á Akureyri og Bíódísel. En meðal efnis sem hún fjallaði um var Glerárdal, hreinsun strandlengjunar, göngu og hjólreiðastíga, Hrísey og svo loks það sem allir eru að tala um , frítt í strætó. Síðan kom hún inn á Bíódisel, en fyrir þá sem ekki vita hvað Bíódísel er, þá er það eldsneyti sem er búið til úr lífrænum efnum, þ.e. korni frá Kanada. Upphaflega átti Jón Ingi að halda þennan fyrirlestur, en hann var víst tvíbókaður þessa helgi, þá kom Lára í staðinn, og stóð sig mjög vel.

Þriðja og síðasta framsagan var um bindingu kolefnis með skógrækt og landgræðslu. Upphaflega átti Þröstur Eysteinsson að flytja þennan fyrirlestur, en sökum veðurs komst hann ekki. En í staðinn kom Brynhildur Bjarnadóttir, og stóð hún sig mjög vel, og vil ég þakka henni hér með fyrir fræðandi fyrirlestur.  Brynhildur kom inn á hversu stórt hlutverk skógrækt og landgræðsla spilar í baráttunni við hnattræna hlýnun. Og þessi fyrirlestur ætti að fara á flesta ef ekki alla staði á Íslandi, enda mikilvægt innlegg í umhverfismálum.

Fundarstjóri fundarins var síðan Margrét Kristín Helgadóttir, og stóð hún sig mjög vel, enda ekki við neinu öðru að búast, enda er hún að verða mjög vön því að vera fundarstjóri. Þess má til gaman geta að hún er skólastjóri Stjórnmálaskólans sem haldinn verður um næstu helgi í Lárusarhúsi, en ég mun auglýsa hann seinna.

Síðan um klukkan 14:00 var sýnd myndin an inconvenient truth, og ég mæli með því að allir horfi á þessa mynd, virkilega góð og vel unnin mynd. Og pælið í því hvernig heimsmyndin væri í dag, ef hann hefði orðið bandaríkjaforseti. Skil ekki ennþá hvernig George Bush gat orðið forseti, ein af stærstu mistökum í sögu BNA.

Sölmundur Karl Pálsson